Léif Kolleegen a Kolleeginnen,

Den ‚Hello Spring‘-Projet staamt ursprénglech aus dem Lycée Michel Rodange an ass d’lescht Joer an Zesummenaarbecht mat der ABIOL an dem Naturmusée op en neits an d’Liewe geruff ginn. D’Zil vum Projet ass et, d’Schüler*innen (vu 7ème VP, ESG & ESC) dozou ze motivéieren, de Wandel vun der Natur am Fréijoer ze dokumentéieren. D’Observatiounen vun ënnerschiddlechen Zeigeraarten ginn op der Plattform „iNaturalist“ gedeelt an d’Temperatur gëtt iwwert de ganzen Zäitraum (Februar-Mee) gemooss. Kommunizéiert gëtt iwwer MS Teams an um Enn gëtt et fir déi motivéiertsten Schüler*innen bzw. Klass e klenge Präis ze gewannen.

An der Testphase 20/21, mat 4 Schoulen (21 Klassen), sinn ëm déi 3600 Observatiounen erakomm. 21/22 fënnt den „Hello Spring 2.0“-Projet am ganzen Land vum 31.01 – 06.05.2022 statt. 

Fir dat beschtméiglechst ze encadréieren an ze organiséieren, biede mir Iech, pro Gebai ee Responsabelen ze wielen an hei wier et och gutt, wa mindestens déi Persoun un enger vun eise Formatiounen deelhuelen géif. Hei kritt Dir erkläert:

• wéi de Projet funktionéiert an opgebaut ass
• wéi een d’Klassen aus sengem Lycée an den iNaturalist-Projet setze kann
• wéi een de Projet praktesch an der Klass ëmsetze kann.

Umellen kann ee seng Klass bis de 24. Januar iwwer dëse Link. 

Mir hoffen, Iech an Är Klassen dëst Joer beim Projet dobäi zielen ze kënnen a freeën eis schonn op d'Fréijoer!